(( إدمان الحزن دون أن تشعر ))
ممكن أصدمك بحقيقة محدش قالهالك قبل كده
يمكن أنت مش حزين
يمكن أنت مدمن حزن
أيوه مدمن
ومش كل الإدمان بيبقى مخدر أو كحول
في إدمان أخطر بكتير !!!
إنك تتعلق بالإحساس اللي بيدمرك لحد ما يبقى هو المكان الوحيد اللي بتحس فيه إنك (( أنت ))
عارف يعني إيه؟
يعني لو صحيت يوم ولقيت قلبك هادي ؟؟ تقلق
لو عدى أسبوع من غير وجع
تحس إن في حاجة ناقصة.
لو حد حبك بصدق
تبدأ تدور على سبب يخليك متطمنش
ولو الحياة ادتك فرصة جديدة
ترفضها
لأنك خلاص اتبرمجت إن السعادة مش شبهك.
يمكن دلوقتي وأنت بتقرأ مستغرب !!
لكن جاوب بينك وبين نفسك.
كام مرة رجعت لشخص كان بيكسرك... مش لأنه اتغير... لكن لأنك اتعودت على كسره؟
كام مرة فتحت صور أو رسائل أو ذكريات كنت عارف إنها هتوجعك... ومع ذلك فتحتها؟
كام مرة حطيت أغنية عارف إنها هتخليك تعيط... وسميتها فضفضة؟
كام مرة حكيت نفس القصة لعشرة أشخاص... مش علشان تتعافى... لكن علشان تفتح الجرح من أول وجديد؟
الناس فاكرة إن التعافي معناه إن الوجع يختفي.
لكن الحقيقة !!
في ناس الوجع عندها اختفى من زمان.
اللي فضل... هو إدمان الحزن
في علم النفس أي شعور بيتكرر لفترة طويلة... المخ بيعتبره مألوف.
والمخ بيحب المألوف
حتى لو كان بيقتله.
علشان كده تلاقي واحد عاش سنين في علاقة مؤذية.
ولما يدخل علاقة سوية.. يهرب
مش لأنه مش بيحب.
لكن لأن الاحترام غريب عليه.
الهدوء غريب عليه.
الأمان غريب عليه.
هو اتعود على التوتر.
اتعود إن قلبه يجري.
وإن أعصابه مشدودة.
وإن كل يوم فيه خناقة.
فلما كل ده يختفي.
يحس إنه مخنوق.
وده مش ضعف.. ولا جنون
ده مخ بقى مدمن كيمياء الحزن.
كل مرة بتعيط...
كل مرة بتعيش نفس الذكرى...
كل مرة بتستسلم للإحساس القديم...
المخ بيفرز نفس المواد الكيميائية اللي بقى حافظها.
ولأنها بقت مألوفة يرجع يطلبها تانى
فتفتكر إنك مشتاق.
وأنت في الحقيقة.. مشتاق للوجع
وده الفرق اللي ناس قليلة بتفهمه.
أنت مش بتفتقد الشخص.
انت بتفتقد مشاعر الحزن
أنت مش بتفتقد الماضي.
بدليل إن الماضي نفسه كان مليان شكوى.
أنت بتفتقد الإحساس اللي اتعودت تعيش فيه.
وده أخطر فخ.
لأنك ساعتها هتبدأ تدور على الوجع حتى لو مش موجود.
تفسر كلمة عادية على إنها رفض.
تخاف من الاهتمام.
تشك في الحب.
تستفز اللي بيحبك.
وتكسر الحاجة الحلوة بإيدك...
بس علشان ترجع للإحساس اللي مخك حافظه.
وفجأة تلاقي نفسك بتقول...
أنا حظي وحش.
لا الحقيقة إن حظك مكنش وحش
حظك كان بيحاول ينقذك
وأنت كنت كل مرة بترجع للنار علشان اتعودت على حرارتها.
عارف إمتى تبدأ تتعافى؟
لما تبطل تعامل الحزن كأنه دليل على عمقك.
في ناس فاكرة إن كثرة الوجع معناها إنها أصدق.
وإن كثرة الدموع معناها إنها أوفى.
وإن اللي بيتعافى بسرعة يبقى قلبه بارد.
وده أكبر كذبة انت بتعشها
القوة الحقيقية ياصديقي العزيز
إنك تحترم عمرك.
إنك ترفض تضيع سنة جديدة علشان شخص خرج من حياتك من خمس سنين.
إنك ترفض تعاقب نفسك على ذنب مش ذنبك.
إنك تبطل تزور قبر علاقة ماتت.
وتقول أصل أنا وفي.
الوفاء عمره مايكون لجثة.
الوفاء يكون للحياة اللي ربنا ادهالك.
وفي الآخر...
خليني أسيبك مع الحقيقة اللي يمكن تمنعك تنام الليلة.
أخطر أنواع الإدمان... هو الإدمان اللي الناس بتشجعك عليه.
لما يقولولك
(( واضح إنك وفي ))
وهم مش شايفين إنك بتنزف.
لما يقولولك
(( الوقت كفيل ))
وهم مش عارفين إن الوقت عمره ما بيعالج حد طول ما هو كل يوم بيفتح نفس الجرح بنفسه.
فاوعى تفتكر إن أكتر شخص ظلمك هو اللي سابك.
أكتر شخص ظلمك... هو النسخة منك... اللي كل يوم بترجع تمسك السكينة... وتكمل اللي الزمن بدأه.