(( الـتـمـثـيـلُ أنَّـكَ بـخـيـر الانتحار الصامت وجريمة تزييف الذات ))
التمثيل إنك بخير دي أكبر كذبة بنعيشها كل يوم وبندفع تمنها من صحتنا ونفسيتنا والكل واقع في الفخ ده سواء كنت راجل واقف زي الجبل ومستخبي وراء قناع القوة الشديدة عشان المجتمع يفترض إنك متتهزش ومتبانش مكسور أو كنتى ست بتصحي كل يوم ترسمي ضحكة مزيفة عشان تداري وراها قلب مفروم من التعب ومسؤوليات مبتخلصش إحنا بقينا مخرجين وممثلين شاطرين أوي في مسرحية هزلية اسمها أنا تمام بس الحقيقة الصادمة اللي لازم تفوقوا ليها دلوقتي حالا إن التمثيل ده مش حماية ده انتحار بطيء على فكرة لما بتمثل إنك بخير إنت مش بتبقى قوي إنت بتجمع متفجرات جوة نفسك ومستني اللحظة اللي هتنفجر فيها في وش أقرب الناس ليك أو في وش نفسك على شكل مرض جسدي زي الضغط والقولون العصبي أو انهيار نفسي مفاجئ مفيش حد هيديك جائزة أوسكار على إتقان دور السعيد وأنت بتموت من جوة ومحدش هيشيل عنك الحمل لما تقع فجأة وتكتشف إن القناع لزق في وشك لدرجة إنك نسيت ملامحك الحقيقية والصدمة الأكبر إن الناس اللي أنت خايف تبان قدامهم ضعيف هما كمان بيمثلوا نفس الدور وكلنا عايشين في دايرة تزييف عاطفي عشان نرضي مجتمع ملوش دعوة بدموعك طول ما أنت بتعرف تبتسم في الصور الوجع بياكل في القلوب والكل مستمر في الكتمان لحد ما بقينا مجتمع مليان جثث بتمشي وتتنفس
الحل العملي مش إنك تقبل النكد ويبقى أسلوب حياة ولا إنك تمشي تشتكي لطوب الأرض في خطوات ومراحل حاسمة لازم تبدأوها دلوقتي حالا عشان تخرجوا من المقبرة دي
1 الاعتراف الكامل والفوري اقعد مع نفسك في أوضة ضلمة وقول الكلمة اللي هربان منها أنا تعبان ومش قادر وموجوع ودي مش قلة رجولة ولا هو ضعف أنثوي ده قمة الشجاعة والوعي
2 إعلان الإفلاس العاطفي قدام الناس اللي بتستنزفكم لازم تحطوا حدود قاطعة مافيش حاجة اسمها هاجي على نفسي عشان خاطر الآخرين لأنك لو اتمرمطت محدش هينفعك
3 تخصيص نص ساعة يوميا للتفريغ السلبي الممنهج سواء بالتدوين والكتابة السريعة لكل الأفكار السوداوية على ورق وتقطيعه بعد كده أو بالبكاء والصريخ في مكان مقفول من غير أي شعور بالذنب
4 التوقف الفوري عن دور البطل الخارق مفيش حد مطلوب منه ينقذ الكوكب على حساب روحه اطلبوا المساعدة بوضوح من شريك الحياة أو الأهل أو المتخصصين وعيشوا حجمكم الطبيعي كبشر بتغلط وبتتعب وبتحتاج ترتاح
5 الفحص الطبي الفوري للأعراض الجسدية اربطوا تعب جسمكم بنفستكم وافهموا إن الصداع المزمن وضربات القلب السريعة هي صرخة من جوة بتقولكم كفاية تمثيل عشان اللحظة اللي هتبطلوا فيها تمثيل إنكم بخير هي بالظبط اللحظة اللي هتبدأوا فيها تبقوا بخير بجد وطالما عندك طاقة تمثل يبقى عندك طاقة تتغير (( فى النهـايـــة))
الحقيقة اللي مفيش مفر منها إنكم لو فضلتوا مستنيين اللحظة المناسبة عشان تبقوا على طبيعتكم فاللحظة دي مش هتيجي غير وأنتم في الكفن الحقيقي التمثيل مش هيحميكم من الوجع ده بس بيأجل الانفجار الكبير وبيخلي تمنه غالي أوي من دمكم وأعصابكم مفيش أي شرف في إنك تدفن مشاعرك صاحية عشان تحافظ على برستيج وهمي قدام ناس لو مت بكرة الصبح هيستبدلوك في ثواني ويكملوا حياتهم عادي جدا القناع اللي لابسينة عشان تداروا بيه ضعفكم وخوفكم بيتحول مع الوقت لزنزانة بتخنق أنفاسكم وبتمحي ملامحكم الحقيقية لحد ما تبقوا غرباء عن نفسكم اخلعوا الخوف ده واجهوا الجحيم اللي جواكم بقلب ميت وافهموا إن الاعتراف بالتعب هو قمة الصلابة الإنسانية.
(( أنا مش بخير )) ده مش إعلان هزيمة دي بداية الثورة اللي هترجعكم للحياة قبل ما الستار يقفل وتكتشفوا إنكم ضيعتوا العمر كله بتأدوا دور بطل في رواية مكنتش بتاعتكم من الأساس لأن النجاة الحقيقية بتبدأ لما تبطلوا تمثيل وتبدأوا تعيشوا حقيقتكم مهما كانت بتوجع